ਗੁਰੂ ਨਾਨਕ ਦਾਤਾ ਬਖਸ਼ ਲੈ | ਬਾਬਾ ਨਾਨਕ ਬਖਸ਼ ਲੈ||

 

ਬ੍ਰਿ. ਪ੍ਰਤਾਪ ਸਿੰਘ ਜੀ ਜਸਪਾਲ ਦੀ ਆਪ ਬੀਤੀ 

ਇਕ ਦਿਨ ਮੈਂ ਆਪਣੇ ਪਿਛਲੇ ਮਹੀਨਿਆਂ ਦਾ ਹਿਸਾਬ ਕਿਤਾਬ ਕਰਨ ਅਤੇ ਕਾਗਜ਼ਾਂ ਨੂੰ ਫਾਈਲਾਂ ਵਿੱਚ ਲਾਉਂਣ ਦੇ ਕੰਮ ਵਿੱਚ ਕਾਫ਼ੀ ਰੁੱਝਾ ਰਿਹਾ| ਸ਼ਾਮ ਨੂੰ ਮੈਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਪਵਿੱਤਰ ਹਜ਼ੂਰੀ ਵਿੱਚ ਨਾਮ-ਸਿਮਰਨ ਦਾ ਨਿਤਨੇਮ ਪੂਰਾ ਕੀਤਾ ਤਾਂ ਮੈਨੂੰ ਇਕ ਨਿਰੰਕਾਰੀ ਸੂਰਤ ਨੇ ਦਰਸ਼ਨ ਦਿੱਤੇ| 

ਇਹ ਹਜ਼ੂਰ ਬਾਬਾ ਹਰਨਾਮ ਸਿੰਘ ਜੀ ਮਹਾਰਾਜ ਸਨ|

ਬਾਬਾ ਹਰਨਾਮ ਸਿੰਘ ਜੀ ਮਹਾਰਾਜ ਨੇ ਪੁੱਛਿਆ- 

ਅੱਜ ਤੂੰ ਸਾਰਾ ਦਿਨ ਹਿਸਾਬ-ਕਿਤਾਬ ਵਿੱਚ ਹੀ ਗੁਜ਼ਾਰ ਦਿੱਤਾ ਹੈ | ਤੁਸੀ ਸਾਰਿਆਂ ਤੋਂ ਹਿਸਾਬ-ਕਿਤਾਬ ਦਾ ਵੇਰਵਾ ਮੰਗਦੇ ਹੋ| ਜੇ ਤੁਹਾਨੂੰ ਇਸ ਜਨਮ ਦਾ ਹਿਸਾਬ ਕਿਤਾਬ ਪੇਸ਼ ਕਰਨ ਲਈ ਕਿਹਾ ਜਾਵੇ?  ਇਸ ਜਨਮ ਦਾ ਹੀ ਨਹੀਂ, ਜੇ ਤੁਹਾਨੂੰ ਪਿਛਲੇ ਜਨਮਾਂ ਦਾ ਸਾਰਾ ਹਿਸਾਬ-ਕਿਤਾਬ ਪੁੱਛਿਆ ਜਾਵੇ ਤਾਂ ਫਿਰ ਤੁਸੀਂ ਕੀ ਕਰੋਗੇ? 

ਮੈਂ ਪੂਰੀ ਤਰ੍ਹਾਂ ਡਗਮਗਾ ਗਿਆ ਅਤੇ ਇਹ ਮਹਿਸੂਸ ਕੀਤਾ ਕਿ ਹਰ ਕੋਈ ਆਪਣੇ ਚੰਗੇ ਮਾੜੇ ਕਰਮਾਂ ਲਈ ਜੁਆਬ ਦੇਹ ਹੈ| ਹਰ ਕੋਈ ਆਪਣੇ ਪਾਪਾਂ ਲਈ ਰੱਬ ਨੂੰ ਜੁਆਬ ਦੇਹ ਹੋਵੇਗਾ| ਹਰ ਇਕ ਨੂੰ ਆਪਣੇ ਸਾਰੇ ਕੰਮਾਂ ਦਾ ਵਿਸਥਾਰ ਵਿੱਚ ਲੇਖਾ ਦੇਣਾ ਪਵੇਗਾ ਅਤੇ ਸੱਚ ਦੀ ਇਸ ਵੱਡੀ ਅਦਾਲਤ ਵਿੱਚ ਠੀਕ ਹਿਸਾਬ-ਕਿਤਾਬ ਅਤੇ ਫ਼ੈਸਲਾ ਕੀਤਾ ਜਾਵੇਗਾ |

ਅਚਾਨਕ ਮੈਨੂੰ ਬਾਬਾ ਨੰਦ ਸਿੰਘ ਜੀ ਮਹਾਰਾਜ ਦੇ ਪਵਿੱਤਰ ਬਚਨ ਯਾਦ ਆ ਗਏ,

ਸਾਡੀ ਹਿਸਾਬ ਨਾਲ ਨਹੀਂ ਮੁੱਕਣੀ,

ਹਿਸਾਬ ਨਾਲ ਸਾਡੀ ਪੂਰੀ ਨਹੀਂ ਪੈਣੀ |

ਕੰਮਾਂ ਦੇ ਹਿਸਾਬ-ਕਿਤਾਬ ਦੇ ਆਧਾਰ ਤੇ ਸਾਡਾ ਬਚਾਓ ਨਹੀਂ ਹੋਣਾ|

ਇਸ ਤੋਂ ਤੁਰੰਤ ਬਾਅਦ ਮੈਂ ਆਪਣੇ ਪਿਤਾ ਜੀ ਨੂੰ ਹੱਥ ਜੋੜੇ ਤੇ ਖੜ੍ਹੇ ਹੋ ਕੇ ਬਹੁਤ ਨਿਮਰਤਾ ਨਾਲ ਆਪਣੀ ਆਤਮਾ ਦੀਆਂ ਗਹਿਰਾਈਆਂ ਵਿੱਚੋਂ ਅਰਦਾਸ ਕਰਦੇ ਵੇਖਿਆ|

ਗੁਰੂ ਨਾਨਕ ਦਾਤਾ ਬਖਸ਼ ਲੈ | ਬਾਬਾ ਨਾਨਕ ਬਖਸ਼ ਲੈ ||

ਮੈਨੂੰ ਮਨੁੱਖ ਦੇ ਕਰਮਾਂ ਦੀ ਭਿਆਨਕ ਬਿਮਾਰੀ ਜਿਸ ਤੋਂ ਕੋਈ ਬੱਚ ਨਹੀਂ ਸਕਦਾ, ਬਾਰੇ ਮਹਾਨ ਰੂਹਾਨੀ ਨੁਸਖੇ ਤੇ ਇਕ ਆਲੌਕਿਕ ਇਲਾਜ-ਸ਼ਬਦ ਸ਼ਕਤੀ ਪੂਰੀ ਤਰ੍ਹਾਂ ਸਮਝ ਆ ਗਈ|

ਸ੍ਰੀ ਗੁਰੂ ਨਾਨਕ ਸਾਹਿਬ ਦੀ ਬੇਅੰਤ ਮਿਹਰ ਦੀ ਕੋਈ ਸੀਮਾ ਨਹੀਂ ਹੈ| ਸ੍ਰੀ ਗੁਰੂ ਨਾਨਕ ਦੇਵ ਜੀ ਵੱਡੇ ਵੱਡੇ ਪਾਪੀਆਂ ਦਾ ਉੱਧਾਰ ਕਰਦੇ ਸਨ| ਦਿਆਲੂ ਗੁਰੂ, ਸਤਿਗੁਰੂ ਨਾਨਕ ਦੇਵ ਜੀ ਨੇ ਕੌਡੇ ਰਾਖਸ਼, ਸੱਜਣ ਠੱਗ, ਦੀਪਾਲਪੁਰ ਦੇ ਕੁਸ਼ਟੀ (ਕੋੜ੍ਹੀ) ਅਤੇ ਹੋਰ ਬਹੁਤ ਸਾਰਿਆਂ ਤੋਂ ਉਨ੍ਹਾਂ ਦੇ ਹਿਸਾਬ-ਕਿਤਾਬ ਨਹੀਂ ਮੰਗੇ ਸਨ |

ਇਹ ਅਰਦਾਸ ਹਰੇਕ ਜਗਿਆਸੂ ਨੂੰ ਸ੍ਰੀ ਗੁਰੂ ਨਾਨਕ ਸਾਹਿਬ ਦੀ ਬੇਅੰਤ ਮਿਹਰ ਦੇ ਘੇਰੇ ਵਿੱਚ ਲੈ ਜਾਂਦੀ ਹੈ | ਅਰਦਾਸ ਮਨੁੱਖ ਨੂੰ ਹਿਸਾਬ-ਕਿਤਾਬ ਦੇ ਪੰਜਿਆਂ ਤੋਂ ਬਚਾਉਂਦੀ ਹੈ| ਮੈਂ ਆਪਣੇ ਪਿਤਾ ਜੀ ਦੇ ਪਿਛੇ ਖੜ੍ਹਾ ਹੋ ਕੇ ਪਰਮ ਕ੍ਰਿਪਾਲੂ ਸ੍ਰੀ ਗੁਰੂ ਨਾਨਕ ਸਾਹਿਬ ਜੀ ਅੱਗੇ ਮੁਆਫ਼ੀ ਲਈ ਅਰਦਾਸ ਕਰਨ ਲੱਗ ਪਿਆ| ਸ੍ਰੀ ਗੁਰੂ ਨਾਨਕ ਸਾਹਿਬ ਦਿਆਲਤਾ ਅਤੇ ਮਿਹਰ ਦੇ ਸੁਆਮੀ ਹਨ |

ਸਤਿਗੁਰੁ ਦਯਾ ਨਿਧਿ ਮਹਿਮਾ ਅਗਾਧਿ ਬੋਧ || 

ਨਮੋ ਨਮੋ ਨਮੋ ਨਮੋ ਨੇਤਿ ਨੇਤਿ ਨੇਤਿ ਹੈ || 

ਭਾਈ ਗੁਰਦਾਸ ਜੀ

ਬਾਬਾ ਹਰਨਾਮ ਸਿੰਘ ਜੀ ਮਹਾਰਾਜ ਮੁਸਕਰਾਏ ਅਤੇ ਅਲੋਪ ਹੋ ਗਏ|

ਲੇਖਾ ਮਾਗੈ ਤਾ ਕਿਨਿ ਦੀਐ ॥ 

ਸੁਖੁ ਨਾਹੀ ਫੁਨਿ ਦੂਐ ਤੀਐ॥

ਆਪੇ ਬਖਸਿ ਲਏ ਪ੍ਰਭੁ ਸਾਚਾ 

ਆਪੇ ਬਖਸਿ ਮਿਲਾਵਣਿਆ॥

ਸ੍ਰੀ ਗੁਰੂ ਗ੍ਰੰਥ ਸਾਹਿਬ, ਅੰਗ 111

ਸ੍ਰੀ ਗੁਰੂ ਅਮਰਦਾਸ ਜੀ ਫੁਰਮਾਉਂਦੇ ਹਨ-

ਜੇ ਸਾਹਿਬ-ਪ੍ਰਭੂ ਕੰਮਾਂ ਦਾ ਲੇਖਾ ਮੰਗੇ ਤਾਂ ਪ੍ਰਭੂ ਦੀ ਸੰਤੁਸ਼ਟਤਾ ਲਈ ਅਜਿਹਾ ਕੌਣ ਕਰ ਸਕਦਾ ਹੈ| ਲੇਖੇ ਦੇ ਆਧਾਰ ਤੇ ਕਦੀ ਬਖਸ਼ਿਸ਼ ਪ੍ਰਾਪਤ ਨਹੀਂ ਹੁੰਦੀ |

ਪਰਮਾਤਮਾ ਆਪਣੀ ਦਇਆ ਨਾਲ ਹੀ ਮੁਆਫ਼ ਕਰਦਾ ਹੈ ਅਤੇ ਆਪ ਹੀ ਪ੍ਰਭੂ ਆਪਣੇ ਨਾਲ ਜੋੜਦਾ ਹੈ |

ਗੁਰੂ ਨਾਨਕ ਦਾਤਾ ਬਖਸ਼ ਲੈ| 

ਬਾਬਾ ਨਾਨਕ ਬਖਸ਼ ਲੈ॥

ਇਹ ਤਰਸਵਾਨ ਸਤਿਗੁਰੂ, ਗੁਰੂ ਨਾਨਕ ਦੇਵ ਜੀ ਨੂੰ ਤਰਸ ਕਰਨ ਲਈ ਅਪੀਲ ਹੈ |

ਇਹ ਆਤਮਕ ਹਿਲੋਰਾ ਦੇਣ ਵਾਲੀ ਅਪੀਲ ਨਿਰਾਲੀ ਅਤੇ ਜਾਦੂ ਵਰਗੀ ਹੈ |

ਗੁਰੂ ਨਾਨਕ ਦਾਤਾ ਬਖਸ਼ ਲੈ| 

ਬਾਬਾ ਨਾਨਕ ਬਖਸ਼ ਲੈ॥